Sejara ni Manurung gabe marga Damanik.

     Ia Oppunta Raja Huta Gurgur Manurung Anakna Opat,ima: 1. Oppu Rj Banualuhung.

2.Torpa ni Aji.

3.Rj Batu Nanggar.

4.Parpinggol Lobe-lobe.

Oppunta Parpinggol Lobe-lobe  ma na gabe marga Damanik songon on ma baritana;

      Ia Oppunta Parpinggol lobe-lobe sada halak ulubalang na begu do natolap mangalo nasai torop musu,

na malo marmossak/silatdohot martondung jala manambari namaborit,jala malo marultop.

     Di nasahli laho ma Ibana marburu tu harangan di Sibisa,diidama sada anduhur na songgop di sada hau,dungi pintor di ultop ibana ma anduhur i laos hona sior ma anduhur i jala madabu.Alai di nalaho mambuat anduhur inon ibana pintor habang do muse anduhuri ondeng tar tuk dangguron daona,alana habong-habongna do hona sior ni ulltop i.jala sai di adu ibana ma anduhur i,anggiat boi dapotsa alai molo dung jonok ibana habang do anduhur i tuk-tuk dagguron didok daona mangeahi tano ni harajaon ni Marga Damanik .Ala naung masuk ibana tu parbalohan ni Simalungun ditangkkup ulubalang ni raja Damanik ma ibana,laos di boan tu adopan ni rajana,jala di beanghon.

    Didabu ma uhuman tu ibana naingkon sipalabe ingkau ma ibana didok raja i.Alai marbisuk ma ibana jala ninna ma mandok raja I; Ueee… da rajanami …! Molo tung bolas do pangidoan ni bawadi nasambor nipi on ua tung loas ma ahu jolo mangolu manang sadia leleng nari di beangan on jala jolo pamokmok hamu daginghu unang amporotan hamu maon mangallang daginghon ai marniang do daginghu,Ai beha do bahenonmuna laho manggallang daginghu molo pintor pasahatonmuna ma ahu gabe sipalabe ingkau?

Ua tung lehon hamu ma jolo ulianhu asa ummokmok ahu asa tabo panganonmuna rajanami?

 Jadi di alusi raja i ma ibana jala didok : Aha ma huroha ulianmu sipasahaton i asa nilehon ,ninna raja i ma tu ibana; Baliang na bara sunggam balanga ma patupa di ahu marpege iris-irisan,ihan saur ni amppang dohot ihan na ni ura,jala ingkon halangonmu do gordang pungkulonmu ogung sabangunan ipe asa pasahat hamua ahu saguru tulomomu rajanami,ninna ibana.

    Ianggo ido pinangidom ba pinatupa pe i ninna raja i mandok tu ibana.

Jadi disuru ma angka naposona laho patupa ulian ni Oppunta ondeng,laos di lehon ma panganonna.

Dung sidung ibana mangan uliannai dipangido ma asa dipatortor ibana Jala dipangido ma gonsina jala manortor ma ibana,sun sagonsi dipangido ma gonsi naasing muse.Tung longang do luhut na marnidasa  tortornai, ai tung mansai uli jala jagar diida nasida panortor ni ibana mangaleap-leap.

Dung i dipangido ma piso alasanna dohot ultopna napinogo ni ulubalang ni rajai,laos di lehon dinasopanagaman,Pintor di pantapulhon ma ulu ni angka ulubalang ni raja i,laos mabiar ma sude angka natorop lumobi raja i marnida ibana laos marsombai.

  Hinorhon ni biar ni raja i dielek ma Oppunta parpinggol lobe-lobe ninna ma: Sombangku ma di tuan itunduk ma ahu tua ho ale tuannami,Ua tung olo ma ho gabe anakhu alana magopo do anon harajaonhu molo dung sundut ngoluku,alana ndang adong anakku nalaho mangganti ahu gabe raja ai pitu boruku dang adong anakhu, ninna.

   Olo do ahu alai marpadan ma hita naso jadi oseonmu padanmu,ninna Parpinggol lobe-lobe.

Jadi marpadan manasida naso jadi mose padanna:Dengke ni sabulan tonggina do tabona ,ise siose padan tu ripurna do tu magona;Pat ni lote tu patni satua, mate pangose mate panguba.

Dungi dipillit oppunta ma sada boru ni raja i bahen parsondukna jala digoar ma ibana disi Manik daboru.jala gabe do ibana marpinompari pola mangarerak sahat tu huta pematang Balata dohot Gunung Malela.Jala naonomnari dibahen  ma songon ibotona.Sipata do laho ibana rap dohot angka siboru ibotna i martiga tuTiga Ras,Tiga Runggu,Tiga, Balata,Pematang.Alai sai jolo sirang do paronan asa sahat nasida ditiga,hape sai hatop do laho angka tiga-tigana di tuhori halak,Ido umbahen digoari ibana Partiga-tiga napunjung.

     Jadi songoni ma barita ni Oppunta Parpinggol lobe-lobe na gabe marga Damanik.

                                                                  Horas bema hita!

                -----------------------------------------000000000000000000000------------------------------