SEJARA NI MANURUnG

GABE MARGA

TAMBA

SEJARA NI MANURUnG GABE MARGA TAMBA

                    SEJARA NI MANURUNG GABE MARGA TAMBA

 

A.Tarombo ni Oppu Rj Mangatur  Manurung.

Ia anak ni Rj Manurung Ht Gurgur 4,ima: 1.Oppu Rj Banua Luhung.

2.Torpa ni Aji

3.Rj Batunanggar.

4.Parpinggol lobe-lobe.

Anak ni Oppu Rj Banua Luhung 2,ima: 1.Patujong.

                                                                2.Oppu Rj Mangatur.

Anak ni Oppu Rj Mangatur 7,ima:

1.Oppu Rj Nawalu( di Parsunian)

2.Patubamban( di Parsunian)

3.Oppu ni Unggul ( di Harangan Sionggang)

4.Rj Si Jambang   ( di Jangga)

5.Soppa Oloan     ( di Narumambing)

6.Tuan Sogar       ( di Janjimatogu)

7.Rj Humuntor    ( Gabe marga Tamba/Ganti ni si Boru Napuan).

    Opunta Si Nomor 7 ma na nidokna Manurung na gabe marga Tamba ganti ni si Br Napuan.

Songon on ma baritana…..

  Ia Oppunta Rj Mangatur marpariban do dohot marga Tamba Sitonggor Lumban Toruan manang sapangalapan boru nasida nadua,ima Boru ni rajai Pu Lahang Mahua Ruma Pea Sian Ht RihitSamosir.Jala oppung boru na dua on linduat ninna;Nialap ni oppu Rj Mangatur ma sihahaan na margoar Si Boru Antin Raja,jala na tu Tamba margoar Si Boru Antin Malela.7 ma anak dalahi di Oppunta Rj Mangatur/Br Antin Raja,dang adong boruna,7 boru ni Tamba/ Br antin Malela dang adong anak dalahi.Andorang so sorang dope anak Pa-7-hon di nasida nadua/ namarpariban nunga sai manghirim nasida nadua na ingkon do oloan ni Oppu Mula Jadi Nabolon sininta ni rohana.

Oppunta Si Br Antin Raja mangido asa boru nian tubuhononna;Si Br antin Malela   mangido asa anak dalahi tubuhononna.Hape huma di bulanna gok ma arina ditubuhon Inanata ni oppu Rj Mangatur  ma anak dalahi,di inanta ni Tamba tong do boru di tubuhon.Jadi 7 ma anak bawa di oppu Rj Mangatur,7 boru ni Tamba Sitonggor Toruan.Hinorhon ni i sai martonggoi ma nasida

ganup ari ganup borngin anggiat nian adong boru di Oppu Rj Mangatur pola do sai laho nasida na dua ripe manungkun angka datu,sampe do diolohon mardebata mangulahon saem,dohot na hombar tusi marguru tu pandok ni datu dirimangi nasida di hatiha i.

Alai hira marumur sataon anak siampudannabe,martahi ma si Br Antin Malela/Tamba laho mangidohon tu paribanna asa olo hahana i mangalehon anak siampudannai songon ganti ni boruna siampudan i. Ninna  mandok sinondukna i:uuee ale amang rajaku,ua laho ma hita manopot dahahang tu bariba tao an anggiat dilehon anakna i dihita asa adong anak bawa di hita jala talehon borunta on asa adong boruna,ninna Si Br Antin malela.Songon dia ma pangalaho ni i betak so olo do anon paribanta mangalehon?ninna sinondukna.Ahu pe mangelek dahahang sai na tulus do langkanta molo pos rohanta tu oppunta Mulajadi,ninna,pature ma sadapinahan jala bahen tudu-tudu ni sipanaganon,laos hara ma haha anginta mandohoti tusi jala talehon silompit ganda upa ni parluga asa boi saguru lomonta martuptup dohot nasida,ninna.

Dungi padostahi ma nasida laos laho manasida manopot haha paribannai marluga sian tuktuk si Asu tu tuktuk si Adong-adong.

Dung sahat nasida na sauduran tu bagas ni paribannai,massai las ma roha ni nasida namarpariban .Huhut dipasahat sipanganon nabinoan nasida tu haha na i. Disigati Oppunta Rj Mangatur ma boan-boan ni anggina i jala tarhalomong ma ibana marnidasa,gabe ninna ma:Nasomal molo ro hamu manopot hami dang hea songon on pola di boan hamu godangna,jala muse marparjambaran dibahen hamu,huhut mamboan raja hamu jala torop uduran,songon dia do pangalaho ni on anggi ninna Oppunta Rj Mangatur.Ima da hahang pariban,panggabean parhorasan do boa-boani i,asa gabe do hita maranak marboru, pasu-pasuon ni Debata Mula Jadi Nabolon marhite-hite pasu-pasu ni raja,ninna Tamba mangalusi.Antong molo songon i ba tama ma huontang angka raja nadison ate?Ninna Oppu Raja Mangatur.Ba tung ima nahupangido da hahang ninna Tamba mangalusi.

     Dung pungu saluhut angka raja niontangnai marsipanganon ma nasida laos dipasahat angka parjambaran marguru tu partording ni ulaon i.Dungi manggabei ma raja laos mamasu-masu hasuhuton nadua ripe.

Tar mangulon ma tahe sangombas huhut marsiturian ma nasida,huhut di parade Inanta ni Oppu Rj Mangatur nahombar tu paborhat anggi paribannai,Dungi dipaborhat hahanai ma anggi paribanna i laos di pataru nasida tu pasir,alai ditongan dalan ninna angina ima tu haha paribanna i,Akkang tung sihol situtu do rohangku mangabing anakta i            jala ho pe ra malungun do roham mangabing borunta on ate? Ninna.Jadi martukkar manasida didalan i dilehon sihahaan ma anaknai tuanggina i jala diabing maboru ni angginai.Hape dihojoti angina i ma mardalan pola songon na marlojongi mangeahi pasir bontean ni solunasida jala dihojoti nangkok tu solu i,

   Hinorhon ni i longang ma Si Br Antin Raja mida namasai,jala ninna ma; Ai dia do binahenmon anggia dilojongi ho mardalan mamboan anakta i jala di hojoti ho masuk tu solum so nanggo masijalangan,Ai dia ma anaktai tu son ai ditinggalhon ho borunta,songon dia do binahenmon tu hami anggia!Ninna Hahana,Jadi ninna angina ima mangalusi; Ai i ma nahudok tu dahahang ai

nunga satolop raja manggabei hita,Boras ma dihadang-hadangan,horas ma hita nang so masijalangan,Nunga pitu liliku,walu jugiaku,ngauli nipinghu,adong dahahang pangalualuanhu,

     Gabe ma ho marboruhon borunta i,gabe ma ahu maranakhon anaktaon,asa adong manuluthon angka borunta naonom nari,alai tonahononhu do dang jadi boi masibuatan pomparan ni anakta on tu angka pomparan muna,nang sian haha agimuna pe marsundut-sundut,Alana Manurung do anakta on,ninna.

Jadi dang tarbahen oppunta manang aha so holan mangoloi na ma ibana di padan ni angginai,jala nina ma:Ima da tutu anggia ba gabe ma ho maranakhon anaktai ,gabe ma ahu marboruhon borunta on,ingot ma padanta si sada anak sisada boru mahita ate?Ninna hahanai.Imatutu gabe ma jala horas dahahang,Ninna angginai.Horas ma!

                                                                            

         B.Siboru Napuan Muli tu Sipolha.

Dung magodang si Br Napuan mansai uli do rupana,jala tung gabe boru hasian ni siraja ibotna do ibana dietong rohanasidabe,jala gabe boru inggal-inggal do ibana di nasida nasaripe.

Marroan ma angka anak ni raja manopot ibana,jala ro ma anak ni raja sian Sipolha namargoar Parmata Manunggal(Sisada mata) manopot ibana laos dioloi ma marbogas.Alai dang satolop angka ibotona napitu i.

Hinorhon ni di topot Parmata manunggal ma nasida sada-sada ;parjolo ma ibana laho  marsomba tu Oppu Raja Nawalu,ninna ma: Rajanami! Aha manaringkot dirohamu patupaonhu di hamu asa olo hamu mangaloas siboru ibotmunai bahen parsondukhu? Ninna Oppu Rj Nawalu ma mandok : “Ingkon do lehononmu boli ni siboru ibot sabara horbo dohot sabara lombu.Jadi ninna Parmata amnunggal ma antong tonggor ma simalolonghon raja nami asa hulehon pangidoanmuna i,ninna.Jadi pintor ro ma horbo sabara dohot lombu sabara tu jolo ni Oppu Rj Nawalu.

Jala songoni ma muse tu Patubamban,dipangido ogung dohot taganing,dilehon Parmata Manunggal ma ogung sitolpus dolok dohot taganing natutur.Jala tu Oppu ni Unggul Ogung do dilehon saparangguan  nadigoari ogung si imbo jala rasi sahat tu sadarion dipeop sian pinomparna do pe ogung inon;Tu Rj Si Jambang Horbo sabara dilehon; tu Sompa Oloan mas sarumbi dilehon,Alai dung jumpang ma Tuan Sogar dipangido ma ingkon lehononmu ma parbinotomi tu ahu.Ala ni i mangganguhi ma Parmata manunggal,ninna ma:Antong rajanami tonngor ma simalolonghon rajanami asa hu pasahat i tu hamu laos dilehon ma piso si aek mual,ima piso alasan namarhadohoan.Molo adong na marsahit dibola ma sada unte pangir, dungi di  ruar ma sian ujung ni piso i samangkuk mual na gabe tawar na boi mangubati na maborit.

Dungi laho ma Parmata manunggal tu Tamba marsomba tu RjHumuntor,dipangido ma hoda asa adong dalan-dalanna nagkok tuat tu dolok laho mandaram haporluan siapari.

Asa dung sikkop sude pangidoan ni anggka oppunta na pitu dipamuli ma si boru Napuan tu Parmata Manunggal Damanik sian Sipolha.

Songon i ma sejara ni Manurung na gabe marga Tamba,asa porlu do tonahonon on tu angka pinompartabe asa hot angka partuturon,lumobi tona ni oppunta. Manurung polin do,sisada anak sisada boru,sotung ma sibuatan hita tu marga Tamba,alana Manurung do nasida.

Baliga do binaligahon barita do binaritahon,ima tona ni natua-tua naparjolo si ingoton ni hita angka pinompar ni Rj manurung.Pauk-pauk hudali pago-pago tarugit,nahurang taulahi nasala tapauli. Boti ma! Horas be ma hita.                       

                                                                                    Janji matogu 2 januari 2012

                                                                                           Ditulis oleh :

                                                                            

                                                                                         Kaliamsyah Manurung Amd Pd

=========================00000000000000000=============================

Turi turian na gabe poda nauli

Judul:Mula ni natua-tua na marujung ngolu        ditambakhon.

   Najolo adong ma sahalak raja nasangap jala na gabe,maranak pitu mar boru sampulu onom,saur matua jala mauli bulung,naung mansai ganjang umurna pola mar 125 taon umurna.

Ia angka pomparanna i dang diboto mula-ulaon tu juma manang tu sabape.ai tung mansai sonang do nasida luhut ditingki ngolu ni natua-tuana i,alana godang do naposo ni raja i mangula juma nasida dohot mangharingkothon haporluan nasidabe.

    Dinasahali dipangido raja i ma sulang-sulang hariapan sian angka pinomparna,jala  dipatupa ma inon di raja i.Jala dipasupasu raja i ma angka pinomparna i.Dung sidung ulaon i,disogot niari dijou raja i masada-sada angka anakna na pitu i dohot boruna nasampulu onom i jojor sian sihahaan sahat rodi siampudan laho pasahat tonana songon on:O.. ale anak hasian ra laho jumpa ma tingkiku maninggalhon hasiangan on,Ai ho do anakhu sihahaan na gabe panggantiku gabe raja molo dung marujung ngolu ahu,molo mate ahu inghon tanomonmu ma ahu tu hariara na bolon,ninna rajai.Olo among ninna anakna i mangalusi.

Dijou muse ma anak sinomor 2,O..ale anak hasian molo marujung ngolu ahu ingkon tanom onmu do ahu tu lombang,ninna rajai,Olo Among ninna mangalusi raja i.

Tu anak nomor 3 didok molo mate ma ahu, tanomonmu ma ahu tu dolok natimbo.

Tu anak si nomor opat didok :Molo mate ahu ingkon halangonmu gordang, pungkul ogung sabangunan asa manortor mangaliat hamu olopan ni raja.

Tu anak si nomor 5 didok:Molo mate ahu inkon lahatonmu sada horbo jantan ni portibi sitingko tanduk siopat pusoran,jala suan sada hau saur marnaek namarsanggul baringin dohot bintatar di pogu ni alaman i asa adong pangalahatanna.

Tu anak na paonomhon didok:Molo mate ahu ingkon tanomonmu do ahu tu eme dohot angka raja ni duhut-duhut.

Tu anak papituhon didok: molo mate ahu, ingkon tanomonmu ahu tu aek.

Tu angka boruna ditonahon: molo mate ahu sogot andorang so dipaborhat ahu tu ingananhu naung hupangido tu angka siraja ibotmuna ingkon patupaonmu ma sipanaganon tu raja nang situan na torop songon mandungoi nasida,manganggapi ahu,ninna raja i tu borunai.Olo Among ninna angka boruna i. Dungi dipapungu ma muse angka pinomparna ninna ma: Asa botoonmuna diporlak ta namansai bidang didolokan,adong do hutanom sarumbi bolon mas dohot angka perak rap dohot simata naarga! Haringkothon hamu mambuat i sotung sanga dibuat halak,ninna rajai.

Dung sadia leleng marujung ngolu ma raja i,marroanbe ma angka sisolhot nasida laho mangapoi dohot manuturi nasida songon dia ma ulaon sipatupaon ni nasida paborhat natua-tua i,hape gabe masi tombisan do angka anak ni raja i ala dang diantusi nasida angka tona ni natua-tua nasidai.

Jala natorop pe dang adong na boi mambahen pandapot na boi pasadahon asa sikkop tona ni raja i laho ulahonon ni nasida,pola do sanga bau bangke ni rajai, alana nga pola 6 ari dang dos tahi ni nasida pature natuatua i.

Dung i adong ma ro sahalak natua-tua mangebati huta i,jala di bege ma namasa i ,gabe dituturi ma nasida manang aha do lapatan ni tona ni rajai tu angka anakna ?Disurirangi ma nasida songonnon ma didok Taba ma hau hariara i mambahen batangna,jala hali ma tano bahen tanomanna( ima lombang nindokna),Pagukguk ma tano mansai timbo bahen dolok natimbo,dung ditanom bangke ni raja i,suan ma oppu-oppuna,jala saburhon eme tu tinamborna,dungi siramma,dohot aek huhut ma marsuap hamu disi,ninna panurirangi mandok angka anak ni raja i.Ueeee… Oto nai hami hape amang natua-tua. Jadi ma di patupa nasida songon nidok ni panurirang i.

Dung hira sabulan dung sidung ulaon saur matua i, mardostahi ma nasida laho mangalului arta tinonahon ni amana,masiboan ansuannabe ma saluhut nasida,jala di ansuani ma tano nadi porlak nasida i,sampe sidung sude songon na hona tinggala ,alai ndada adong mas,perak dohot simata dapotnasida,Mandarse ma nasida ala ni lojana mandior arta i di porlak i huhut marsak,jala sai masisungkunan nasida,aha muse do nidok ni amanta tu hita asa suruonna hita mandiori mas diporlak naon?

Hape naso panagaman nasida ro ma panurirang ondeng tusi ,didok ma ,eeee…Angka naoto ia mas nidok ni amang muna i ndada ntutu ditanom diporlak on.Suani hamuma naung niansuan muna i sude asa adong pandaraman muna ido nidokna mas tinanomna dison. Asa ulaonmuna do porlak on asa adong sinamot dihamu,ninna panurirangi.Dungi dioloi ma manuani angka haporluannasida be disi,jala ringgas ma nasida mula-ulaona be.Ai didok panurirang i tu nasida:

Pidong garugu pidong ni toba ,naburju marguru dapotan poda

Pidong ambaroba pidong harangan,naburju mangula nabutong mangan,

Hamu angka sigurbak ulu marguru ma hamu tu porhis,

Garap gurup,rap mangurup-urup.

Jadi songon I majolo sarito ondeng ba horas bema hita.