Hata Huhuasi.            

Jumolo ma tapasahat hamauliateon ni rohanta tu Amanta Debata Jahowa Pardenggan  Basai ala dilehon do tingki dohot hahipason tu hita saluhut pinompar ni angka natua-tua i jala boi pinatolhas tu angka pomparan ni natua-tua taringot ni sejara ni Oppunta  namarsahala jala nagabei,ima Oppunta Tuan Sogar Manurung.

Buku on disurat mangihuthon panuturion dohot tona ni ni angka natua-tua naparjolo,lumobi  tahe sian damang nahinan(Parsarune manang Op si Tomuan Manurung)dohot dahahang (Op si Sarma Manurung)

sian Janjimatogu Kec.Uluan.

     Ganup masa angka ulaon adat, panangkok saring ni angka natua-tua dohot panulangion ni natua-tua sai natua-tua naduaon do di jou angka hasuhuton manuturi ulaon i andorang di ngoluna.Sai jotjot do tahe ro angka natua-tua manang marpungu-pungu dibagasnami sian uju sihadakdanahonhu manaringoti angka sejarah ni angka natua-tua na jumolo gabei huhut mangkatai partording ni angka ulaon adat na porlu si ulahonon asa tutur ulaon i soada haribo-riboan.

 Buku on sinurat laho pajojorhon tu angka pomparan ni Oppunta taringot tu Sejara ni angka  Oppunta  sijolo-jolo tubu nagabe i .

Ndang adong nanggo saotik nahurang manang na hugandai manang na sada hatape sejarah on sian tinonahon ni damang dohot dahahang sinurathon di buku on.Alai tahe mangido paniroian dope ahu sian sandok pinompar ni natu-tuai atik tung adong dope nahurang dok sian nabinotomuna be.

       Jadi songoni ma jolo hata huhuasi sian ahu namanurat bukuon,sai  anggiat ma adong gunana di hita

Nagabe manghorhon poda nauli di hita ganup pinompar ni natua-tua.Asa baliga do binaligahon,barita do binaritahon,marhite panuturion dohot tonani natua-tua taringot tu kissah ni Oppunta nasangap nagabei.

Pauk-pauk hudali Pago-pago tarugit,nahurang taulahi nasala tapauli.

                                                                                                             Janjimatogu tgl 31 Desember2011

                                              

                                                                                                                              Panurat.

                                                                                                           

                                                                                                            Kaliamsyah Manurung AmdPd

                

                         DAFTAR ISI.

             Hata Huhuasi………………………………………………………………………...i

             Daftar Isi………………………………………………………………………………ii

             BAB I. Hata Patujolo………………………………………………………………1

            1.Tuan Sogar sada halak datu tuan nabegu……………………………1

            2.Sahala hadatuon…………………………………………………………………1

            3.Asal usul ni Oppunta…………………………………………………………..2

            BAB II.Tuan Sogar mandopang Rj Hasibuan…………………………..3

            BABIII.Tuan Sogar marmusu dohot Bius Siantar……………4s/d6

            BAB IV.Tuan sogar laho tu Dolok Sanggul………………………7s/d9

            BAB V.Pangujungina…………………………………………………………….9

                                                        

                                                       BAB I. Hata Patujolo.

1.Tuan sogar sada halak datu Tuan nabegu.

Dia do lapatan ni halak nabegu?Halak nabegu marlapatan do i naboi marhalindo manang boi do ibana dang tarida diida halak nangpe soadong mangholipi ibana Oppuntape boi do songoni molo dihadang ibana ultopna.dohot hadang-hadangan na namarisihon anak ni ultopnai.Jala boi do disuru ibana angka begu dohot angka natubu diladang mangalo musuna.Isarana angka tolong dohot bulu boi disuru gabe hujur mangalo musuna.

              2. Sahala hadatuon.

                    

Ndada namarguru sian jolma oppunta asa gabe datu naboi manambari namaborit,so holan sahala hadatuon nasian oppuna do mangajari ibana jala di ulahon dungi sahat tu habeguon muse namarpahean

lak-lak dohot tali tali andor-andor nguknguk dohot marultop.Alai tutu ditambai laena Parmata Manunggal  Damanik ma muse parbinotoanna.Ai ido dipangido songon parsiholan sian laenai asa diloas boanonni laenai si Boru Napuan.

             3.Asal-usul ni Oppunta.

Ia huta haroroan ni Oppunta sian harangan sionggang do didok angka natu-tua namanuturhon sarito on.

Naro do nasida tolu halak namarhaha maranggi sian harangan sionggang lao manopot raja Hasibuan na sangapi ,hape dang dijangkon raja i nasida gabe tubu ma salisi ni nasida dohot Raja i.

                                                       ===========00000000=========

                                            

                                             

                                        BAB II.Tuan sogar Mandopang Raja Hasibuan.

Tuat ma tolu halak namarhahamaranggi anak ni Oppunta Op.Rj Mangatur Manurung  sian Harangan

Si onggang ala dibege nasida barita ni Raja Hasibuan nasangap na gabei.Tung mardos tahi do nasida natolu na ingkon sahat manjumpangi Raja I,alai di tongandalan didok oppunta ma tu hahana nadua I

Beha do di rohamuna sotung ma pola sanggam rohamuna nadua mandapothon rajai?ninna.Sahalak sian nasida mandok songon namarjambang do imbuluku mandapothon raja I ala hubege barita ni hasa ngangaponna,jadi roma ompunta mandok antong molo boti ala dilaosi ho do hatam sian dosni tahinta

Si jambang ma goarmu bahenon olat nion,ianggo ahu manogar do imbuluku na ikon do sahat ahu tu huta I mandapothon ibana.ninna.Ia ho beha do ninna ma tu nasadanari ,alusna oloan hu do naung tapatikhon ingkon sahat hita mandapothon raja i,ninna huhut songon na marsoppa.Gabe inon ma musedibahen goarna( Soppa Oloan).Jadi mamuka sian i ma goar ni nasida natolu sahat rodi sonari on.

Sahat ma nasida natolu tu jangga Disi ma muse nasida maradi jala tinggal ma raja Sijambang disi ala didok nadenggan do huida tano dison, dison ma jolo ahu ninna mandok oppunta naduai.

Hape sahat ma nasida mardalan tu Nalela didok Soppa Oloan ma parjolo ma jolo ho hu dapothon pe ho tusi,ai sogon na denggan do hu ida tano dison bahen pandaraman ,ninna.Jadi tinggal ma Oppunta Soppa Oloan disi.Jala laho ma Tuan Sogar patulus langkana mandapothon Raja i,alai jolo dipikiri do aha laho si ulahahonna.

Dung sahat ibana tu hutai dipaula ma maminjam ogung sian raja i,Ninna ma Ue.. rajanami uahupinjam ma jolo ogung munai ai adong ulaonhu di hutanami ai marpesta sahalakku.Jadi ninna Raja Hasibuan ma mandok Ibana;ise do ho jala didia do hutam ale?

  Jadi ninna tuan sogar ma mangalusi raja i: Ia goarhu rajanami Pamungkir do jala tarsingot didia huta ni

bawadi nabotoon ni raja i do i marsogot.Ai diboto rajai do didia manggkuling ogungmunai dibege hamu ba disi ma huta ni bawadi.

Jadi didok Rj Hasibuan ma rupa ni naso martontu do leakmu,jala dang maradat ho !Abitmu  pe laklak ndang leak pahean ni  jolma  tali-talimpe andor, sian dia do harorom tu luaton ?Jala laos di usir ma ibana sian hutai.

Ala ni i mansai marsigorgor ma rohani Tuan Sogar maradophon Raja i huhut dinunuti mardalan uju hasundutan ni huta jala laos disi ma ibana martabuni huhut marpikiri aha ma nalaho siulahononna .

Di na saborngin dapotsa ma angkal laho mangalo raja Hasibuan jala na ingkon bungkasonna do rajai sian hutana,jadi sai mardemban ma ibana manipat ni borngini sampe loja iponna manghihili ,jala hopa-hopa na  dohot  hua ni demban i dippungu tu sada hudon boru boru,ala somarna gok hudon i,jala ngaloja ibana manghilhili gabe di duda ma napuran i. Dung gok hudon ondeng ,borhat ma ibana tu huta ni raja i di borngini laos diloslos ma sude nasa ramba na humaliang ,lumobi di harbangan tu huta dohot ruar tu balian,so ganda holan sanggar ma natinggal disi ipe ala naung godang do maluha patna diseati sanggari umbahen so sude hona loslos.Dung sidung sude inon juguk ma ibana laos di pantalpukhon ma sopa-sopa ni deban I sasaotik jala huana diusehon sasaotik huhut marpinda-pinda juguk.Dungi martabuni ma ibana di inganan nasoding disi.

Dungi torang ma ari ruar ma na di huta i tunggkan balian,diida ma ma namasa disi ,gabe tarhalomong marnidasa.Jala mulak tu huta paboahon tu raja I ;Ueee..da rajanami adong ma namasa di balian ni hutaon,aha do umbahaen songoni namasaon?Jadi tarsonggot ma Rj Hasibuan marnida namasa I,gabe

didok ma: Uee..adong sada bawa ro maminjam ogung namburaon alai tutu nda hulopas pangidoanna,sotung ma sapata ni inon namasa on?

Di na tarhalomong nasida sude, Jou-jou ma Tuan Sogar sian inganan partabunianna i ninna ma: Dia jolo husurmi da………!.asa adong abittu..huhut di suru jala di paborhat mansai godang tolong gabe songon hujur dohot sior. Holan mambege dohot mida I, hatahutan ma nasida saluhutna ai dirimpu rohana naung  godang ro musu laho mangalele nasida,Jala mangua ma muse Tuan Sogar :Songon garaga, songon garugu,nasada gabe songon na tolu pulu,Tuuunduk ,ninna. Laos buhar ma nasida sian huta i ,alai dang lupa nasida manuguthon ogung na i  tu inganan nasoding laos di tanom.Jala Gr Mangaloksa pe ndang lupa mamboan sampohul tano dohot mual sa tabu-tabu . Laho ma nasida bungkas sian hutanai(Batu gara),alai, ala tinggal asu ni Raja marjalo gabe mulak ma ibana muse tu pudi jala manginsugut di bona ni sanggar na sohona loslos i jala topet do songgop pidong setset di punsu nisanggar i laos gaor ma seset i songon napaboahon adong jolma  martabuni disi,alai dipangido Raja marjalo ma tu seset i : unang ma laho ho sian i seset unang dapot ni musu i ahu dison annon ,ai molo laho ho sian i luluanna jala gabe botoon ni musu i do ahu na dison jala padanhu tu ho naso jadi do hasoanhu ho sahat rodi pinomparmu tu pinomparhu ndang jadi pangannonna dagingmu ninna mandok seset i.Alani i sai tong ma disi meat seset i.Mamolus ma muse sian i Oppunta Tuan Sogar sian i laho mangalului nasida,jala sanga do ditilik tu sanggar i,ala diida seset songgop disi dang laho rohana manigati bona ni sanggar i,gabe didok rohana do:Sugari adong jolma disi dang tagamon adong songgop seset disi,ninna.Jadi malua ma Raja Marjalo sian jea i di hatiha i.Jala sian i ma ibana manongon tu ramba na dingkan hasundutan (sonari didok Lumban Bao),jala laos disi ma ibana masibuni laos mangula pandaramanna.Disuan ibana ma jelok jala ramos do parbuena.Ianggo didok juma ni Tuan Ria do inon nian.Adong do didok boru ni Oppunta Tuan Ria Sibuntuon sisada tarus ,sai jotjot do namborunta i laho tu juma i mansalong haporluan siapari.Jala diida ma jelok i naung lan parbuena,gabe dibuat ibana ma sada parbue ni

jelok i laos songon i ma muse padua halihon ,dung patolu halihon tarjegot ma ibana di juma i jala hadapotan di bahen Raja marjalo:Hee…i  asa tung lomo-lomom mambuat na so ugasanmu?

ninna.Tarhatotong ma boru ni Tuan i jala hatahutan .Alusna: Ai juma ni damang do on boasa oraanmu

ahu mambuat nasinuan ni damang?Jadi ro ma Raja marjalo mandok: Ahu do manuan i ndang  Amangmu!

Jadi marbagas roha roha ma namboru i dohot raja Marjalo disi laos soangir ma namboruntai.

Mida I, Longang ma Tuan Ria Mida borunai jala di sungkun ma: Ai ise do donganmu boru umbahen songonon ho?Jadi sai tangis ma borunai dang pintor olo paboahon,alai sai di unung Tuan Ria do boruna i

Alai marpangidoan ma boru ondeng  tu amana i naso jadi bunuon manang agia dihahua sibawa dongan nai.

 Jadi ninna Tuan Ria ma tu borunai paboa ma inang ise ma huroha dongan mu asa songon

 on ho?Jadi di paboa ma na Rj Marjalo do donganna.Bah na so adat naso uhum do i nian ito ,alai beha ma bahenonhu sotung ma marmuruk anon dohot Amang tuam ai musuna do inon?Alani i Humalaput ma

ibana mandapothot Tuan sogar jala marsomba paboa sorbanna ala  na masa i tu borunai;Tung marpamuati ma roham mida ahu, huelek ma mabadia ni roham dahahang mida musum Alana nunga tung  songon i huroha nasibta marboru naingkon saut ma ibana tu musui,ninna.Jadi dioloi Tuan Sogar do pangidoan ni Tuan Ria i unang pola be agia di hahua Raja Marjalo,Gabe saut ma borui tu Raja marjalo .Jala dilehon ma jumanai songon pauseang tu boruna i,laos disi ma dipajonjong bale-balena.Ima mulana huta Lumban  Bao.

                                                        ---------------00000000000000000-------

                                                  

                                                BAB II.Tuan sogar marmusu dohot bius Siantar

A.Tuan Sogar dimimithon marga Sibuea.

Ia namargoar bius Siantar ima bius na marparbalohan Toba dohot  Uluan manang namarmargahon pinompar ni tuan Sorba ni Banua

Dung leleng ma Tuan Sogar tarbarita datu tuan nabegu martuptup ma bius siantar naeng mambunu ibana,songon on ma sejarana.

Di paula marga sibuea ma marmusu dohot angka marga naasing di sabola habinsaran,dungi roma marga sibueai mangontang Oppunta Tuan Sogar manolong nasida laho mangalo musuna i .Jala marjanji do marga sibuea I naingkon lehononna mansai godang sinamot songon upana dohot sada boruna na uli bahen parsonduk ni Oppunta molo boi monang maralohon musuna.

Di na sahali targogot ma Tuan sogar di topi ni aek Asahan gabe laos manimbung ma ibana tu batang aek i,jala dirimpu roha ni musuna i ma naung mate ibana ,hape mangolu jala ruar ma ibana sian aek i laos manginsugut tu bona ni gala-gala naadong disi,laos disi ma iba na maradi.

Ala ni malena mankail dengke ma ibana disi(ima mulana gabe digoar huta Gala-gala panghailan), jala di tutungi laos dipangan, marnida timus ni api na disi ro ma angka musuna muse mangalele ibana alai ndang dapotsa.

Hape di nasadari manogot niari laho ma maragat marga si buea ondeng, hape diida ma Tuan Sogar modom di ginjang topet di bakkar ni bortai , ala ni lojana dihilala diolati angka musuna, dimimtmithon marga si buea i ma ibana tu musuna i.Dungi marroan be ma angka musu i mangarongom ibana tu bona ni borta i;adong mandok tuat ma ho sian i !ninna alai adong do na manaek tu borta i alai di pandabuhon do sude ganup na manaek laho mangaroro Ibana.

Hinorhon ni i ditaba natorop i ma borta i,dung marumpak bortai pintor sigop do Tuan Sogar hehe alai pintor boi do di tangkup angka musuna i ibana laos di beanghon ma ibana,jala di dabu raja ni bius ma uhum tu ibana na ingkon do bahenonnasida gabe si palabe ingkau .

Dung songon i uhuman i di dabu tu ibana ba tung unang ma jolo pintor sonari ahu pasahat hamu bahen sipalabe ingkau rajanami mangido ma ahu tu hamu :ua jolo pamokmok hamu ma daginghu asa untabo jala umpola allangonmuna!Ninna Oppunta Tuan sogar mandok musuna i.

Gabe ro ma musuna i mangalusi:Antong aha ma pangidoanmu dok ma asa nilehon,ninna.

Jadi ninna Tuan Sogar ma mandok raja ni bius i:Jagal asu si tommbet do dohot manuk mira  jarum bosi dohot ihan saur niampang do lehononmuna singkop marpege iris-irisan, tuak tagkasan jala ikon halangon muna do gordang pungkulonmuna ogung sabangunan jala patortoronmuna do ahu dung i pe asa pasahat hamu ahu hombar tu lomomu sotung maon amporotan hamu mangallang daginghu,ninna.

Dungi dipatupa ma angka i sude,dilehon ma tu Oppunta laos dipangan ma sipanganon i.Dung sidung i, Dipangido ma asa manortor ibana jala dipangido muse ma pisona piso si aek mual nanipogo ni musunai asa dipaulak nian tu ibana.Sude pangidoanna dialopi raja ni bius i do.Dung i manortor ma ibana mangaleap-leap.

Sidung sada gonsi dipangido ma muse gonsi na asing,alani malo ni ibana manortor gabe sai longang ma angka raja ni bius i paida-idahonsa.Dung sidung sada gonsi nari badipangido ibana ma muse gonsi ni hadatuon dohot habeguonna,hinorhon ni i sai longang jala tarhatotong ma angka raja i dohot angka ulu balang napitu rodi angka natorop i paida-ida hamaloon ni Oppunta i.Di nasopangaman sigop ma di nasanghidop mata dienet piso alasanna si Aek mual i sian sarungna laos di pantampulhon ma ulu ni angka ulubalang na pitu ni bius i dohot angka raja na.Ala ni i maporus ma sude angka natorop i lumobi angka musuna i sude ala ni biar ni nasida maradophon Tuan Sogar,

Dungi didapothon marga sibuea I ma ibana laos didok jalo ma upam,jala boan ma boruku sada di ho bahen parsondukmu,ninna.Alai ala sogo ni rohani Tuan Sogar mida sibuea ondeng ninna ma mangalusi ndang tupa idaonmu laho saut diahu borum i ai parmimit doho hape,jala dang haposan ho sandok lehon upanghu najinanjihonmu saguru tu padanta,ninna .Alai sai di elek Sibuea ido Oppunta Tuan Sogar asa asa dipasaut borunai ,ai didok rohana molo saut ibana hela jala adong anakna sorang sian borukon tontu mabiar do halak agia mida ahu ala ni ibana,ninna rohana.Jadi gabe saut ma borunai di parripe oppunta Tuan Sogar jala sorang ma anakna sian inon namargoar Oppu rajum.

B.Tuan Sogar marhuta di Gala-gala pangkailan.

          Dung manang sadia leleng nari adong ma masa ulaon bius di huta i.

Di nasadari adong ma ro horbo narintik gasaon manggaori ulaon i,jala mabiar ma angka loloan na torop i mida namasai,ai tung sude do di barungkas horbo i nasa na adong ni idana disi,tung so diboto nasida be manang aha si patupaonna laho mambahen menak horboi.

Alani I didok raja ni bius ma :Tingting ale!manang ise nabarani mangalo manang pamenak horbo narintik i tung lehonon do upana saguru tu lomo ni rohana manang aha upana! ninna.

Tongon do ro Tuan Sogar disi,laos didok ma ahu ma rajanami alai aha ma lehononmu di ahu molo boi hupatunduk horboi?ninna ibana.Saguru tu lomom ma tuannami ninna rajai ma.Antong jolo marpadan ma hita asa hu patunduk horbo I,ninna Tuan Sogar.Antong aha ma pangidoanmu asa nilehon ninna raja i ma tu ibana.

Ingkon lehononmu ma tano nasa bolak ni hinangkam ni bobak ni horboi asa adong hapeahan ni sobanhu dohot parguluan ni pathu,ninna.

Jadi roma simatuana (Si buea) mandok:Ai ianggo nasa i do bolakna pangidoanmu hape tano dison sai lapang,ba hulehon pei di tuani ai naooto do huroha  ho! ninna.Ai dirimpu rohana do nasabolak ni bobak ni horbo i laho silehononna.Jadi marpadan ma nasida:Dengke ni sabulan tonggina do tabona,ise siose padan tu ripurna do tu magona;Pat ni lote tu patni satua Mate pangose,mate panguba.

Dungi sogot nai muse roma horbo narintik i manggaori ulaoni muse,pitor sigop ma Tuan Sogar mandopang horbo i laos dipungilhon ma ulu ni horbo i.Mida i longang ma sude nasa namarnidasa gabe mabiar mida Oppunta Tuan Sogar.

Dung mate horbo i ,rongom ma angka natorop i ai dirimpu rohana  pintor boi buantonna daging ni horbo i bahen juhut,hape diorai Tuan Sogar do:unang  jolo jonok hamu tuson anjokko hubuat upaku jolo sun pe hubuat bobak nai di hamu pe annon dagingnai ninna ibana.Ai molo moru bobaknai annon  gabe moru do upaku lehonon ni rajai ,ninna.Dung sidung dibuat bobak ni horbo i di tinggalhon ma dagingna i dibinda angka na torop i.Jala diboan ma bobak ni horbo i tu jabuna.

Dung piga ari ro ma sibuea i mandok tu Tuan Sogar:Boan ma bobak ni horbo i asahulehon upamondeng!

Paima jolo mahiang ,unang bau maon raja nami ninna .Dung saminggu disuhuni sibuea ma muse: Nga didia bobak ni horbo i ninna.Paima jolo rajanami ninna oppunta Tuan Sogar.Diure ibana ma bobak i nasa balga ni bonang,gabe bonang huling-huling ma bobak i.Dung sidung bobak i di ure di boan ma turaja i mangido upana hombar tu padan nasida.

Dung i roma sibuea mandok tu ibana:Nunga didia bobak ni horboi?ninna.

Nga di hadang-hadanganhon rajanami patudu ma tano silehononmu songon upani bawadi ninna Tuan Sogar.

Ba nunga sambor nipinghu,pompot ni oloanhu hape,ba!maup ma ahu hape ninna Sibuea ima.

Ba !beha mai rajanami ai naung hata ma padan dang tarjua rajai be so magopo ninna Tuan Sogar ma.

Jadi ma di pabostang bonang huling-huling i ;

Sian Purba tu Pastima(Timur-Barat),Pantik ma disi rajanami asa hupantik dison! ninna Tuan Sogar.

 Sian Dangsina tu Utara(Selatan-Utara).Pantik disi rajanami asa hupantik dison!Ninna Tuan sogar muse

Suda ma hona suhat tano ni si buea i rodi hutana,gabe bungkas ma nasida sian hutana.

                                       ==================000000000000=====================

                                                        BAB IV.Tuan Sogar laho tu Dolok Sanggul.

A.Tuan Sogar Marga Simamora Debata Raja?

Tung mansai godang do halak nasai manungkun jala sungkun-sungkun :Songon dia do parsolhoton ni marga Manurung tu Simamora Debata Raja?Nadeba mandok sude do Simamora Debata Raja marampara tu Manurung,;Sian Simamora Debata Raja mandok dang sude Simamora Debata raja namarhubungan tu Manurung holan Nahum diimana do.Sian  Manurung mandok dang sude Simamora  Debata Raja i Manurung ,holan naso siallang jagal ursa do.

Antong !Ise do Oppunta Tuan Sogar? Marga Simamora Debata Raja  do,manang marga Manurung?Molo sude do pomparan ni Opunta Nahum diimana ndang boi mangallang jagal ursa

Sude do nasida masuk tu Manurung?Molo Manurung do Tuan sogar I boasa masuk tu tarombo ni Nahum di imana?Balikna muse :Molo Marga Simamora do Tuan Sogar i, Boasa masuk tu tarombo ni Oppu Raja Mangatur generasi Ke IV Toga Manurung,jala pinomparna untorop di Uluan?(Anakna 9 halak,boruna 3 halak).Molo taparohahon hariara natubu ditambak ni Oppunta Tuan Sogar na di Batu najagar Dolok sanggul uju dia do gumodang dangkana,jala aha do alatanna?

Angka on ma naringkot sitotaron nian unang pola sai adong sungkun-sungkun naso boi sidung sian roha ni angka pomparan ni natua-tua i,asa unang adong gabe sambil namarsipinggili manjorati angka generasi na laho ro muse :Gabe so boi masi olian marga simamora Debata raja dohot Manurung.Hinorhon ni padan?Antong songon dia do asa solot Tuan Sogar tu tarombo ni Nahum di imana Simamora Debata raja?

             Jaha hamuma jala antusi hamu angka pomparan ni natua-tua i ma na sinurat/ napinajojor di toru on.

B. Jujur ngolu ni natua-tuai (Tuan  Sogar).

            Andorang so borhat Oppunta tu dolok sanggul nunnga torop anakkona di uluan,ima:1.Paliang,2.Rj Natotar.3.Op ni Harian,4.Guru Mangaraja,(Naopat on marhuta di Janjimatogu)

          5.Rj Siperek,marhuta di Sihubak-hubak,6.Op Pungutan marhuta di Lbn Tonga-tonga Narumambing,7.Op Rajum di Gala-gala Panghailan,8.Guru Pangajian di Jangga dolok.9.Rj Pardemban di Pardembanan.Boruna 3 do na binoto,ima 1.Siboru Medengedeng.muli tu Raja Baruara Tambunan 2.Namuli tu SiHaloho  marhuta di si hubak-hubak jonok tu Aek salak.3.Namuli tu dlk 1000.Marhuta di Lbn Ginabean Desa Partor Janjimatogu.

 Dung tarbarita ma Oppunta Tuan Sogar datu bolon jala ulubalang nabegu tu saluhut manisia na adong di tano batak on roma sahalak sian pomparan ni Simamora Debata Raja namargoar Nahum di imana mangontang Oppunta Tuan sogar,mangido pangurupion laho mandopang musuna. Ise do ulaning angka musuna?Jala aha do bonsirna?Aha panghorhonna?

Ia musuna ima sian angka dongan tubunado,haha angina nadeba,dohot angka marga naasing.

Bonsirna ala ni na marjuji dohot marundang-undangan do.Panghorhonna masi bunuan dohot masilelean, masi bungkasan.

Dung sahat Nahum diimana tu uluan di parseo disuhuni ma tu angka na jumpasa disi manang nadidia do Tuan Sogar maringanan.Ujui najolo onan ndang di Porsea sonari dope di Sirait uruk do pe onan nagodang.Alai sude luat do ro maronan tusi martiga ro do sian simalungun sian samosir marsolu bolon.nang sian dairi pe dohot humbang.

Topet onan nagodang do parro ni Nahum dimana laos pajumpang ma ibana di parseo dohot Tuan Sogar.Mansai las ma rohani Nahum diimana dung pajumpang dohot datu jala ulubalangi.

Ue ….tuan nami ua urupi ma au laho mandopang angka musuku di luatnami an,napos do rohangku ingkon namonang ahu mangalo angka musui molo olo do tuanhu mandohoti ahu tu hutanami,manang dia pe dipangido roham hualopi pe disi,ninna Nahum diimana.Jadi ninna Oppunta ma tu Nahum diimana :Molo dibahen ho ma ahu songon anakmu ba na olo do ahu mangalo musum ,ninna.Dungi marpadan ma nasida nadua,ima padan na soboi mose.

Dungi borhat ma nasida nadua marsolu do nasida laho manaripari tao manuju dolok ni pangururan,manigor ma tu Dlk Sanggul.

Dung sahat nasida tu huta ni Nahum di imana jala di boto natorop, mabiar do sude musui midasa.

Aha do nahombar si patupaonhu tuannami?ninna Nahum diimana ma.Jadi ninna Tuan sogar ma:

Asu sitommbet ma patupa! pature mai marpege iris-irisan dohot tuak tangkasan,ihan saur niampang.Dung dipatupa ma i manogot ni ari ,Marpahean laklak ma Tuan Sogar hande-handena laklak,jala tali talina andor nguknguk do, ianggo nahum diimana paheanna pahean ni raja do. Dipangan nasida ma sipanganon i ;Jala molo dipangan sipanganon na sian jagal asu i di posat ma bona ni andor tali-talina i Jala sude ma andor nguknguk na di balian dohot di harangan mallunguk-lunguk ,sude asu na adong di luat i marauangi .Hinorhon ni i mabiar ma sude musuni Nahum diimana,didok :Nga ro musu beta ma  hita ale!Jadi angka musuna namabiar patu bungkas ma sian luati.

Tung mansai holong ma roha ni Raja Nahum diimana mida Oppunta Tuan Sogar,gabe  didok rohana ma:Beha do bahenonku asa tongtong datu on mian rap dohot ahu dison!ninna.

Adong do boru ni raja i naung ma balu ala dibunu musu sinondukna di harangan laho mandiori ubat,Ai marsahit na posi do boru ni raja i,jadi dipangido Nahum diimana ma asa ditambari Tuan sogar boruna I.Diubati Tuan Sogar ma boruna ondeng laos malum ma di hilala.

Dungi holong ma rohani boruna ondeng tu Tuan Sogar jala dipungka ma marbagas.Dipaula so di parrohahon Nahum diimana do inon,agia tahe las do rohana jadi boruna ondeng gabe parsonduk ni Tuan Sogar,ai molo adong nanggo sada pe anakna  sian boru on  mabiar do musu I mida ahu ,ninna rohana.

Dung sun sude naporlu di Nahum diimana mulak ma Tuan Sogar tu Uluan parose angka pinomparna,jala leleng ma ibana di Uluan,hape manang sadia leleng nari soangir ma boru ni Nahum diimana .Dungi hu ma di bulanna gok ma arina,marhodo hodo ma boruni raja i laho manubuhon nadi bortianna,alai dang tolapsa manubuhon poso-posoi laos mate ma boru ni raja i,alai poso-poso nadi bortianna sai tong mangolu do.Jadi ditaruhon ma bangke ni borunai tungkan dolok jala di tantan tu lombang,dung i di hungkupi ma dohot angka bulung-bulung ni hau

dohot ramba naadong dilombang i dohot panghirimon anggiat manumpak asi ni roha ni Mulajadi Nabolon tubu poso-poso i .Jadi dang di kubur ina natinampar ni lali najolo ditaruhon do i tu inganan na asing sian parbandaan,jala di hungkupi dohot ramba /bulung ni hau.

Dung adong hira saminggu ,adong ma sahalak parsoban tu dolok i laos marsoban tu lombang na disi,jala adong ma dibege ibana songon soara ni poso-poso na tangis di lombang i;Mabiar situtu ma ibana umbege soara I;sotung na homang I nuaeng ,humalaput ma ibana ruar sian lombang I ala ni biarna.Alai mulak ma ibana muse tahe,ai didok rohana:ai tu son do di ari naung salpu ditaruhon hami boru ni rajai ninna rohana,tuat ma ibana muse mijur tu lombang I ,hape di ida ibana ma,sada poso-poso dipatarus ursa dilambung ni bangkei,naeng di abing ibana ma dakdanak I alai dang diloas ursa I ,agia muse naeng di pungkir ursai do ibana.Alani I,maporus ma ibana nangkok sian lombang I sahat tu huta ni raja I,laos di paboa ma tu Nahum di imana,ninna ma:Raja nami nda tu lombang na di dolokan  do tataruhon bangke ni boruni raja I na minggu nasalpu?Adong ma nuaeng sada posos-poso dilambung ni hapeahan ni borumunai na sai tangis,jala dipatarus ursa,beta ma ta ida,ninna.Jadi ro ma Nahum diimana mandok tu parsoban i:ise do ho?Sotung na pairis-iris bulung ni bulu ho parigat-rigat bulung ni tolong,pasungul-sungul hinalungun paingot-ingot sidangolon?Jadi ninna parsoban I ma: ndang rajanami situtu do na hudok naung hu ida do jala naeng hu abing do poso-poso I alai dipungkr ursa ido ahu.

Atong molo boti Molo nasintong nindokmu ba nadenggan majaloon mu lehononhu do upam marguru pangidoan mu,alai molo so tutu ni alua-luhonmu ba gabe sipalabe ingkau ma ho bahenon ate!Ninna raja ima tuparsoban i.Ba ipetaho rajanami,alai molo tutu do nahudok ba lehonnonmu ma upaku songon nidok ni raja I,ninna parsoban I mandok raja I.Jadi mabulan ma nasida naso talut mose.

Jadi didasdas Raja I ma parsondukna:O …ale inang na mora boru ,Parsonduk bolon na uli lagu,beta ma tajalahi pahompunta ninna sorang di lombangan dipatarus ursa ninna baeon!boan parompana dohot ampotna,huhut mangangguk bobar nasida nasaripe.

Adong sada asu ni rajai na malo martondung ,didasdas ibana ma asui asa dohot jala parjolo mangeahi situjuonnasida:Turut! huhut di pajaja ma asui laos parjolo laho tu dolok ,dungi mulak

muse ma asu i huhut sai marawangi ,laho muse, mulak muse,sai songonima asu i sai marawangi paboa natutu do adong poso-poso di lombang i dipatarus ursa, marlojongi ma sude na sa namangihut tusi jala mangangguk bobar do raja Nahum diimana huhut marlojong mangeahi lombang hapeahan ni borunai naeng humatop abingonna pahompunai sian lombangi.

Dung sahat nasida tu lombangi di ida ma tutu poso-poso i naung di patarus ursa.Jala di padonok jala dieahi ma ursai laho mangabing poso-poso i sian holang-holang ni pat ni ursa i,alai ditandak ursa I do ibana ,dung pe di elek ma ursai boruku ma ho mulai sadari on ho ma panganti ni boruku beta ma hita muli tu huta,loas ma huabing anakmon da hasian!ninna Nahum diimana.

Dungi diloas ursa ima diabing poso-poso I,laos mangihut mulak tu huta.Sahat ma nasida tu huta,diharoani ma pahompuna i jala di bahen ma goarna Manurung Simamora Boru-boru.Jala disuru ma angka naposona mambahen sada bale-bale inganan ni ursa i jala dipiaro gabe songon boruna manang dia ma naringkot di ursa i dalopi nasida nasaripe mai.Jala molo tangis poso-poso i

dilehon ma pataruson ni ursai.Dung I ditongos Raja Nahum diimana ma surat tu Tuan sogar,

Disurathon di bulu suraton :Tuan Sogar!Nunga sorang anakmu alai nga mate ianggo boruku,songon i ma hatana di surat i Dibahen ma sarung ni surat i sanjongkal bulu tolang ,jala di pamasuk ma surati marangkup sigira-gira. namarlapatan, asa hatop surat i sahat, jala di ambalhon ma surat i uju Uluan marhite alogo,jala sahat ma tu Tuan Sogar,dungi bohat ma Oppunta Tuan Sogar tu Dolok Sanggul manjalahi anaknai.Jala ditonahon Raja nahum di ibana na do naso jadi panganon ni nasida jagal ursa rodi pinompar ni pinompar ni pahompuna i.

                                                                              BAB V.  Pangujungina.

   Songon ima sejara ni hubungan ni manurung dohot Simamora Debata raja mangihuthon tona ni

angka natua-tua na sahat tu panurat sejara on.

Jala dang na mangaliga,jala dang na mamogo ,dang na mambahen asa marsirang  Manurung dohot pomparan ni oppunta  Simamora debata raja,holan na pahothon do. Alana di taon 1963 pe barita na di Dolok sanggul do hape Oppunta Tuan sogar marujung ngolu,laos disi ma dibahen tambak ni natua-tua i.Ai naro do pomparanna sian dolok Sanngul paboahon uju I,ala sai didiori angka pinomparna natinggal di uluan ,Didia do tambak ni natua-tuai ?Jala songon ima sude jujur ngolu ni oppunta Tuan sogar nasai binege jala ditonahon tu hami marsundut-sundut.

          Molo adong dope na mamboto sejara ni natua-tua i nadumenggan ba boi do muse tatambai asa dumenggan      

          suraton muse.Boti ma.

                                                      =================================